IDU一年零三個月

一年零三個月
今日無聊睇返舊Blog，先知原來「劃你個頭」 IDU唔覺唔覺已經經歷了一年零三個月，劃過既頭真係數都有排數，由初初定價$99加到而家$200都仲有人幫襯，証明IDU真係有市場既，不過最衰小弟 只係玩票性質，唔係太落力宣傳，無當IDU係一門生意，我相信如果有心做都應該揾到食既。

滿足
我做IDU最開心既並唔係因為有錢收，而係交完貨，聽到d客既反應同埋讚嘆，真係好有滿足感，呢種開心係有錢都買唔到，每次睇返啲作品都好開心。不過，唔收 錢又唔得，初初就係唔收錢幫朋友劃吓，結果其他朋友見到就個個都話要，我邊有咁多時間應付，攪到好多時都不了了之，交唔到貨比d朋友。要收錢就唔同喇，起碼有動力迫我去完成，唔駛拖住拖住。

曾經聽過朋友講，話係邊度邊度見都d好似你咁又係劃個卡通樣既衫喎，我有睇過，不過始終個風格同我劃果d唔同，人有人做我有我做，我係為興趣多過為銀紙，所以都無乜點理過。

我覺得我呢種風格已經成為一種屬於我既標記，由其係我果對眼，我試過就咁將我果對卡通眼劃落任何物件上面，都睇到係自己，都幾攪笑。有次同大眼嫂講開話，不如第時我死後，車頭相都用返我劃果張啦，佢話其實佢都係咁諗，唔知d親友鞠恭時會喊定笑。

成功與失敗
其實係呢一年零三個月，都有過好多構思，有d成事有d得個諗字，例如有做過t-shirt、賀咭、鎖匙扣、相架、貼紙、小朋友餐盒水杯、MSN icon等等，不過要數最成功，都莫過於利是封，真係大受歡迎，做到要截單！最失敗係，本來構思過想出本書，整整吓發覺其實都幾多嘢，要出人地個樣就要問 過d客仔先得，但實在有太多客仔，我又懶，所以只係整咗幾頁就停咗係度，計劃暫時閣置，算係失敗既個案。

Some Idea!
為慶祝一年零三個月，我構思了一張海報作為留念，會將我劃過既人頭或角式擺埋一齊，唔知大家鍾唔鍾意呢？

多謝
最後，要多謝一直有睇我IDU作品既朋友仔，同埋一班客仔，無你地我都唔會係一年零三個月內劃咗咁多作品！多謝晒

海報在此
劃過又肯出鏡既大約百幾人


呢兩隻就係我屋企既化骨龍...

慢慢我會再post返啲舊作出嚟比大家欣賞！